Piloti spanjoll i Yamaha, Maverick Vinales ka fituar sot garën e Çmimit të Madh të Australisë në Moto GP, zhvilluar në pistën e Phillip Island. Ky është suksesi i parë sezonal si për poilotin ashtu dhe motorin Yamaha, që rikthehet te fitorja pas 25 garash. Në podium u ngjitën edhe dy pilotë italianë, Andrea Iannone me Suzuki dhe Andrea Dovizioso me Ducati.
Një garë për t’u harruar kjo për kampionin e saposhpallur Marc Marquez, që në xhiron e gjashtë u dertyrua të tërhiqej pas një kontakti me Johann Zarco. Gara nis e qetë, por menjëherë Marquez e Dovizioso nisin duelin e zakonshëm, deri në momentin kur spanjolli del jashtë pistë dhe tërhiqet. Nga ky moment në skenë del motori Yamaha, me të dy pilotët e saj, Vinales e Rossi.
Por spanjolli është ai që guxon më shumë, ka një marsh më shumë se rivalët dhe arrin të shkëputet, duke lënë pas italianët të duelojnë për podiumin. Zhgënjen Valentino Rossi, që e mbyll garën në vendin e gjashtë edhe pse në mesin e saj duelonte për fitore apo podium. Gara e radhës, pas një jave në Malajzi.