Në një intervistë ekskluzive për France Football, Kylian Mbappe ka lënë jashtë listës së pretendentëve për Topin e Artë Leo Messin, i cili e ka fituar pesë herë këtë trofe personal. Argjentinasi, bashkë me Cristiano Ronaldon kanë dominuar trofeun që jepet pikërisht nga revista franceze, por adoleshenti i Paris SG nuk e ka futur fare në listën me pesë kandidatët e mundshëm për këtë vit.
“Do të fusja në listë Cristiano Ronaldon. Por edhe Modric, si edhe Varane, që ka fituar gjithçka. Edhe Neymar se ka bërë një Botëror të mirë. E për ta mbyllur listën do të vendosja veten sepse do të më pëlqente të isha aty”, ka thënë 19-vjeçari për “France Football”.
Përveç Messit jashtë kësaj liste të improvizuar nga lojtari i ri më i mirë i Botërorit ka mbetur edhe shoku i tij i skuadrës, Antoine Griezmann.
Argjentinasi bëri vërtet një Botëror zhgënjyes, por sezoni i tij me Barcelonën u mbyll me fitimin e kampionatit dhe Kupës së Spanjës si dhe me trofeun e golashënuesit më të mirë në Europë. Ndërsa Griezmann fitoi Europa League me Atletico Madrid. Por Mbappe shtoi: “Besoj se në një vit ku është zhvilluar Kupa e Botës, ky turne ka më shumë impakt se sa kampionatet, sepse është një kompeticion më i madh. Unë do të preferoja më shumë të fitoja Botërorin se sa Champions League”.
