Partizani ka vendosur t’i besojë sërish drejtimin teknik një italiani. Demat e kuq që u shpallën kampionë të kategorisë Superiore para një muaji, kanë zyrtarizuar në pankinë italianin Franko Lerda që do udhëheqë kryeqytetasit në sezonin e ardhshëm. Prezantimi i italianit do bëhet javën e ardhshme.
Franko Lerda nënshkroi kontratë një vjeçare më kampionët në fuqi. Akordi i nënshkruar me trajnerin që vjen nga Apeninet është me të drejtë rinovimi. Italiani 51 vjeçar ka një karrierë të pasur si futbollist dhe si trajner.
Ai ka qenë një sulmues i cili ka luajtur me ekipe të njohura në Itali ku mund të përmendim: Breshia, Kievo, Çezena, Katania, Torino dhe Napoli. Ai ka drejtuar edhe ekipe me emër në Itali siç janë: Sasuolo, Krotone, Leçe dhe Torinon. Skuadra e fundit e Lerdës ishte Viçenca, që e shkarkoi para 3 vjetësh dhe e riktheu në stol, deri në bindjen e teknikut për të provuar një aventurë shqiptare.
