Lenc Armstrong mbetet një emër i madh i sportit të çiklizmit, edhe pse u përfshi në një skandal dopingu, Së fundmi një gazetar francez, i quajtur Antoine Vajer, zbuloi një skandal të ri në lidhje me ish-çiklistin e famshëm amerikan.
Ai u shpreh se 7 herë fituesi i Turit të Francës, të cilit iu hoqën të gjithë titujt e fituar për doping, ka përdoruar një motor të vogël të instaluar në biçikletën e tij për të ecur më shpejt.
Eksperti i çiklizmit e ka vënë re këtë fakt duke studiuar në detaje disa video në të cilat ish-kampioni amerikan shihet duke prekur pjesën e pasme të shalës. Menjëherë pas këtij gjesti, Armstrong, papritmas do të rriste shpejtësinë.
Bëhet fjalë për një pajisje që peshonte vetëm 800 gram, pra e lehtë për t’u fshehur në biçikletë, e përbërë nga një motor që do të prodhonte 500ë energji dhe një bateri të futur brenda shishes së përdorur nga çiklistët. Pavarësisht nga fuqia e shtuar, duhet të vazhdosh pedalimin që pajisja të funksionojë:
“Nuk është si të ngasësh një motor. Duhet të punosh shumë për ta bërë atë të funksionojë”, – shpjegoi Gibings, kreu i kompanisë “Typhoon”, prodhues i këtyre motorëve. Armstrong presupozohet se e ka instaluar këtë sistem gjatë viteve të karrierës së tij. Mbetet për t’u parë tashmë si do të vazhdojë kjo çështje dhe nëse do të ketë një hetim të mirëfilltë.
