Thibaut Courtois do të qëndrojë te Chelsea dhe bashkë me atë, sipas të gjitha gjasave, edhe Eden Hazard. Është vetë portieri belg që njofton se tashmë është pranë akordit me “Blutë e Londrës” për rinovimin e kontratës, që ka aktualisht si afat skadence vitin 2019.
“Jam i lumtur te Chelsea dhe një marrëveshje është pranë. A ishte një shpërqëndrim historia e rinovimit? Jo për mua, kam qenë gjithmonë i qetë dhe i shplodhur, pavarësisht zërave dhe aludimeve. Jam i përqendruar te Chelsea dhe jam i lumtur këtu”, deklaroi portieri për ‘London Evening Standard’.
Kontrata e belgut tjetër të skuadrës në “Stamford Bridge” skadon në vitin 2020, dhe ylli i “Bluve të Londrës” mund të ndjekë gjurmët e portierit bashkëkombas. “Unë dhe Eden kemi inkurajuar njëri tjetrin.
Nëse firmos ti, atëherë firmos edhe unë. Mendoj se jemi të dy të lumtur te Chelsea, kemi fituar titullin dy herë në katër sezonet që ndodhem këtu dhe mund të arrijmë majat me këtë fanellë”, deklaroi gardiani i portës së Chelseas.