Teuta e ka nisur me një barazim zhgënjyes në shtëpi vitin e ri kalendarik, 2018. Ndaj Lushnjës së vendit të fundit, durrsakët nuk ia dolën të marrin tri pikët, duke e lënë veten sërish në ujëra të ftohta mbijetese.
Trajneri Stavri Nica kërkoi hapur pas kësaj sfide përforcime, sidomos në sulm, sepse situate nuk është aspak e mirë. Mirëpo, direkt pas barazimit 2-2 me lagunarët, klubi durrsak ka njoftuar marrëveshjen me një mbrojtës, duke e lënë repartin ofensiv të “djemve të detit” ende zbuluar. Ja njoftimi i bregdetarëve: “Masahudu Alhassan është bërë sot zyrtarisht pjesë e Teutës.
Mbrojtësi nga Gana ka mbërritur në Durrës për të firmosur fillimisht kontratën dhe nisur menjëherë stërvitjen me skuadrën. Alhassan ka nënshkruar për gjashtë muaj, duke përforcuar kështu mbrojtjen e Teutës. 26-vjeçari ka luajtur më parë me Perugia, Latina dhe Novara”.
