Futbollisti kosovar, Milot Rashica, po ndiqet me shumë interes në Holandë dhe nga ekipi më i madh i vendit të futbollit total, Ajaksi. Lajmi bëhet i ditur nga “Tuttomercatoweb.com”, që shkruan se sulmuesi anësor i Viteses ka shanse të mëdha të jetë pjesë e gjigantët holandezë.
Gjatë verës së kaluar Rashica ishte në shënjestrën e Udinezes, që nuk arriti ta transferonte në Serinë. Tani lojtari shqiptar që luan për Kosovën pritet të jetë një goditje në fundin e merkatos nga Ajaksi, një klub i njohur historikisht për evidentimin e talenteve. Do të ishte një tranferim i bujshëm, nëse do të realizohej.
Rashica nuk ka dalë në stërvitje dhe nga drejtuesit e Viteses është bërë e ditur se mund të shitet. Përveç Ajaksit, i interesuar për Rashicën është edhe Shtutgarti në Gjermani.
Nga transferimi i futbollistit kosovar pritet që Vitese të arkëtojë nga 5 deri në 10 milionë euro. Vetë lojtari ka pohuar pak ditë më pare se, nëse do të ishte mire për të dhe klubin, do të largohet nga Vitese.
