Manchester United do të vizitojë Sevilla për në 1/8-t e finaleve të Champions League në atë që do të jetë përballja e parë mes këtyre dy klubeve në një veprimtari të organizuar nga UEFA. Stadiumi “Ramón Sánchez Pizjuán”, shtëpia e Sevilla, është i famshëm për atmosferën e tij dhe i frikshëm për skuadrat udhëtuese. Që kur u mposht nga Juventus, 3-1 në nëntor të vitit 2016, “andaluzianët” kanë humbur vetëm një ndeshje në shtëpi në të gjitha veprimtaritë, 5-3 derbin ndaj Betis në janar 2018. Sevilla u kualifikua për në këtë raund të Champions League pasi grumbulloi nëntë pikë, shtatë prej të cilave para syve të tifozëve të tyre, ku logjikisht nuk u mposhtën asnjëherë.
Në tetë ndeshje kundër “andaluzianëve” në karrierën e tij trajneri portugez ka fituar shtatë dhe barazuar një, por në “Sanchez Pizujan”, Sevilla ka pësuar vetëm 1 humbje në 16 muajt e fundit…
Gjithsesi, nëse ekziston dikush që di si mposhtet Sevilla ai është Jose Mourinho. Si trajner i Real Madrid ai u përball tetë herë me këtë skuadër, duke fituar shtatë ndeshje, ndërsa njëra prej tyre u mbyll në barazim. Manchester United u kualifikua për në fazën me eliminim direkt pasi fitoi pesë nga gjashtë ndeshjet e luajtura. Sulmuesi i Sevilla, Wissam Ben Yedder, ka shënuar gjashtë nga 12 golat që ka shënuar gjithsej skuadra e Vincenzo Montella në Champions League. Për shkak të mungesave dhe problemeve në gjetjen e golit, Manchester United do të bazohet edhe një herë te Romelu Lukaku, i cili shënoi dy gola në ndeshjen e fundit të kësaj skuadra në Kupën e Anglisë, fituar 2-0 kundër Huddersfield.
Të dyja këto skuadra kanë shënuar 12 gola në fazën me grupe, mesatarisht dy për ndeshje, por ndërsa Manchester ka pësuar vetëm 3 gola, Sevilla e ka nxjerrë topin nga rrjeta e saj në 12 raste. Forma e Sevilla në shtëpi gjatë këtij sezoni ka qenë me të vërtetë mbresëlënëse me 13 fitore, 5 barazime dhe 1 humbje në 19 ndeshje të luajtura, ku në nëntë prej tyre nuk ka pësuar gol. Sevilla e ka mesataren e kartonëve të verdhë 1.5 karton për ndeshje gjatë këtij edicioni të Champions League, ndërsa Manchester United e ka 1.3. 50% të ndeshjeve të United në fazën me grupe janë mbyllur mbi 2.5 gola, ndërsa 83% e ndeshjeve të Sevilla është mbyllur në të njëjtën mënyrë.
