Në rast se Manchester United humbet sot në përballjen ndaj WBA, skuadra e Manchester City shpallet automatikisht kampione në Premier League. Por trajneri i “qytetarëve” Pep Guardiola u shpreh sot se nuk do të qëndrojë në shtëpi, ulur para televizorit për të parë takimin dhe bërë tifo për ekipin e WBA. Spanjolli ka të tjera plane, do të luajë golf dhe nuk ka ndërmend të prishë qetësinë për të parë ndeshjen e rivalëve.
“Rezultatin e vetëm që dua të shoh sot pasdite është ai që do të bëj duke luajtur golf. Ne nuk varemi nga të tjerët, por nga vetja jonë. Megjithatë, unë besoj se United do ta fitojë atë ndeshje”, u shpreh Pep Guardiola. Skuadra e tij ka 16 pikë avantazh ndaj United pas fitores 3-1 ndaj Tottenham. “Mendoj se kemi shansin tjetër që titullin kampion ta festojmë pas një jave në shtëpinë tonë, para publikut tonë”, tha trajneri spanjoll.
