Para gjysmëfinales së parë të Ligës së Kampionëve, Bayern Munich-Real Madrid, në “Allianz Arena” (të mërkurën, 25 prill, ora 20:45), Juup Heynckes, trajneri i ekipit gjerman, foli për “Sport Bild”.
Gjëja e parë që Heynckes kërkon të bëjë është të heqë presionin nga të tijtë, duke e fokusuar vëmendjen e bavarezëve te ndeshja e radhës në Bundesliga. Tashmë, gjigandët gjermanë e kanë në xhep titullin kampion.
“Unë mendoj vetëm për ndeshjen në Hannover, pastaj për atë të së mërkurës. I marr gjërat me radhë, e kam thënë gjithmonë. Duhet të mbajmë ritmin edhe në kampionat, gjithashtu”, – pohon trajneri veteran.
Heynckes ka folur në mënyrë të qartë edhe mbi dallimet në mes të dy yjeve, nëse iu referohemi Real Madridit dhe Bayern Munich: Cristiano Ronaldo e Robert Lewandowski: “Ata nuk mund të krahasohen. Robert luan gjithmonë me shpinën e tij ndaj kundërshtarit. Ronaldo shpesh vjen nga ana e majtë dhe lëviz në mes të linjave. Ajo që e bën të shquar portugezin është se herë-herë shfaqet edhe në pozicionin e plotë të qendërsulmuesit”.
Së fundi, Heynckes, gjithashtu, kishte fjalë lavdërimi për një trajner tjetër veteran, si Arsene Wenger, i cili do t’iu japë fund 22 viteve “mbretërim” në krye të Arsenalit, kësaj vere: “Ai ishte një nga trajnerët më të mirë në futbollin europian dhe ka pasur një ndikim pozitiv në futbollin anglez, përmes filozofisë së vet”.
