Neymar ka filluar të ecë pa paterica teksa ylli i Paris Saint-Germain dhe Brazilit vijon rikuperimin e tij pas dëmtimit serioz.
Lojtari më i shtrenjtë në botë pësoi një dëmtim të rëndë më 25 shkurt teksa PSG po mposhte Marseille me rezultatin 3-0, atij iu dha një kohë rikuperimi rreth 3 muaj pasi iu nënshtrua operacionit.
Trajneri i PSG Unai Emery ka sugjeruar se Neymar do të jetë në gjendje të rikthehet përpara fundit të sezonit, megjithëse 26-vjeçari thotë se pritet të bëjë një ekzaminim të fundit më 17 maj, çka do të thotë se nuk do të fillojë stërvitjen përpara asaj date.
Me ndeshjen e fundit të PSG që do të luhet më 19 maj, është e sigurt që ai nuk do të luajë më te PSG për këtë sezon.
Por gjithsesi ai është duke bërë progres teksa ka postuar një video në Instagram duke shkruar: “Mirupafshim paterica.”