“Ende nuk është mbyllur duel për titullin kampion, por ndaj Bolonjës kemi bërë një hap shumë të madh përpara. Na mungojnë ende edhe 3 pikë për ta fituar matematikisht titullin”, deklaroi sot trajneri Massmiliano Allegri, që ka mbetur i kënaqur nga fitorja 3-1 arritur ndaj Bolonjës. “Rivalët bënë një ndeshje të mirë, na vunë në vështirësi, pasi u mbrojtën me rregull, ndërkohë që edhe ne nuk ishim shumë të qartë në pjesën e parë, duke gabuar në rastin e penalltisë. Për fat reaguam mirë dhe rikuperuam shpejt”, tha Allegri, që sheh afër finishin e sezonit.
Më tej, trajneri i bardhezinjve analizon lojën e bërë nga skuadra e Juventusit në këtë sfidë: “Dougls Costa është një nga ata lojtarë që bën diferencën, që arrin të zgjidhë ndeshjet. Një ditë më parë u bë baba, kishte pushuar pak, ndaj e nisi ndeshjen nga stoli. Edhe prë Dybala ndeshja ishte e vështirë, pasi ishte krijuar një ngërç, por pasi u shënua goli i parë edhe ai e pati më të lehtë”. Trajneri tani përgatitet për finalen e Kupës së Italisë, ndaj Milanit: “Do të luajmë ndaj Milani, që po bën mirë së fundi, por është një finale dhe ne do të luajmë vetëm për ta fituar atë”, tha Allegri.