Carlo Ancelotti nuk ka pritur aspak për t’u njohur me ambjentin në klubin e Napolit. “Don Carlo” ka nisur menjëherë nga ndërtimi i skuadrës së sezonit të ardhshëm dhe sipas hulumtimeve të mediave italiane, Arturo Vidal do të jetë goditja e parë e “Erës Ancelotti” tek Napoli.
Një ide që është përforcuar më shumë nga një foto e postuar nga vetë mesfushori i Bayern Munich. Në foton e shpërndarë në rrjetin social “Instagram” kiliani shfaqet në praninë e të afërmve të tij, ndërkohë që shkruan:
“Duke shkuar në shtëpi me bandën! Gjithmonë është mirë të kthehesh në Itali.”
Vidal ka një kontratë që e mban në “Allianz Arena” deri në qershor 2019, por “Kicker” raporton se Bayern Munich do ta lë të lirë të vendos për të ardhmen e tij.
Arturo Vidal u aktivizua për 4 sezone me Juventus-in përpara se ai t’i bashkohej Bayern Munich në verën e vitit 2015 për shumën e 37.5 milionë euro.
