Një kampion bote për Kamzën. Pietro Vierchowod është shumë pranë stolit të skuadrës nga periferia e kryeqytetit dhe sipas të gjitha gjasave do të jetë ish mbrojtësi i kombëtares italiane trajneri i ri i Kamzës. Pas shkarkimit të Julian Ahmatajt i cili arriti të mbante Kamzën në Superiore por gjithsesi nuk u konfirmua në stol, presidenti Qarri dhe krytari i Bashkisë Xhelal Mziu po shqyrtojnë çdo alternativë të mundshme për t’i besuar stolin e skuadrës kryeqytetase.
Pak ditë më parë i ftuar në emisionin “ Proçesi Sportiv” në Top Chanell, Mziu konfirmoi faktin se Kamza po shikon nga tregu i huaj për të gjetur pasuesin e Ahmataj dhe mesa duket do të jetë një italian që është shpallur kampion Bote me të kaltrit, trajneri i ri i skuadrës nga periferia e kryeqytetit. Pietro Vierchowod i cili njihet më shumë për arritjet në fushën e blerë sesa në stol është shumë pranë marrëveshjes për të marrë drejtimin e Kamzës. 59-vjeçari nuk ka patur shumë sukses si trajner. Skuadra e tij e fundit kanë qenë hungerezët e Honved tek të cilët punoi për vetëm pak muaj pasi u shkarkua në tetor të 2014-ës për shkak të rezultateve të dobëta.
