Jose Mourinho arrin marrëveshjen me organet tatimore në Spanjë, duke shmangur nisjen e procedimit për evazion fiskal, që mund ta çonte drejt burgut trajnerin portugez. Sikurse njoftojnë mediat spanjolle, trajneri aktual i Manchester Unitet akuzohet se ka shmangur taksat nga të ardhurat që i ka përfituar për të drejtat e imazhit (3.3 milionë euro) gjatë qëndrimit në krye të Realit të Madridit për periudhën 2010-2013.
Falë kësaj marrëveshjeje, “Special One” do të zgjidhë përfundimisht problemet me drejtësinë spanjolle, duke paguar një gjobë prej 800 mijë eurosh. Në këtë mënyrë Mourinho largon edhe rrezikun e dënimit me 12 muaj burg.
Nuk është hera e parë që trajneri luzitan përfundon në bankën e të akuzuarve nga autoritetet tatimore në Spanjë. Në vitin 2015 u detyrua të pagunate 4.4 milionë euro për të stabilizuar pozicionin e tij fiskal për vitet 2011 dhe 2012.
