Taulant Seferi, pas fitores në miqësoren kundër Bjellorusisë (3-2), në dhomat e zhveshjes është fotografuar me një bluzë (kanatiere) të bardhë, në të cilën shkruhej “Kumanova është Shqipëri”. “Kumanova është Shqipëri. Shumë i lumtur me fitoren dhe me asistin. Ju faleminderit për të gjitha mesazhet e bukura, krenar me këtë fanellë kaq të bukur”, – ka qenë postimi i Seferit në rrjetet sociale.
Dhe, ky postim i tij në Facebook është bërë temë kryesore në disa media maqedonase. “Provokim i rëndë nga ish-lojtari i Maqedonisë: Kumanova është Shqipëri!” – është titulli i portalit “sportclub.mk”. Më tej, në artikullin e këtij portali thuhet se “Seferi, në miqësoren kundër Bjellorusisë, ka pozuar me fanellën me mbishkrimin: Kumanova është Shqipëri”.
Ndërsa portali tjetër “Sport1.mk” del me titullin: “Ishte debutues më i ri për Maqedoninë dhe tani vesh fanellën me mbishkrimin: Kumanova është Shqipëri”. Ky portal me ironi shkruan se nuk pret nga “kokat e mençura” të FFM-së ndonjë reagim.