Mauricio Pochettino vijon të mbajë hapur derën për ofertën nga Real Madrid. Në një intervistë për stacionin Radio Rivadavia, trajneri aktual i Tottenham ka folur në lidhje me mbërritjen e mundshme të tij në krye të pankinës së Los Blancos dhe për shanset që përfaqësuesja e Argjentinës ka në Kupën e Botës ‘Rusi 2018’.
“Është një nga klubet më të rëndësishëm në botë, është krenari që emri im është lakuar, çfarëdo që të ndodhë në të ardhmen, duhet të jesh i përgatitur për atë që mund të ndodhë më pas. Unë jam i lumtur te Tottenham”, deklaroi Pochettino, mbi aludimet se mund të emërohet në krye të Real Madrid.
Në lidhje me Argjentinën dhe shanset e përfaqësueses bardhekaltër për të fituar Kupën e Botës, tekniku i Tottenham deklaroi: “Ky është një nivel i mirë, ne kemi shumë shanse. Ne kemi gjithashtu edhe futbollistin më të mirë në botë. Jam shumë krenar për futbollistët që ka kombëtarja”.
