Për tifozët e Milanit është shtuar paqartësia me afrimet e shumta në klub në postet drejtuese. Në mediet italiane është shkruar shumë për largimin e trajnerit Genaro Gattuso dhe vendosjen në vend të tij të trajnerit Antonio Conte.
Realisht, Conte nuk është një emër i ri. Ka gati një sezon që në selinë kuqezi emri i tij përmendet për t’u ulur në stol. Në lidhje me një transferim të mundshëm, me anë të një telefonate, presidenti i Milanit, Paolo Scaroni, sqaroi gjithçka dhe solli qetësinë. Numri 1 i klubit e bëri të qartë se nuk ka ndërmend të largojë trajnerin aktual Gattuso nga detyra.
Vetë tekniku ka qenë i shqetësuar për të ardhmen e tij.
E kjo është vënë re nga drejtuesit e tjerë, të cilët kanë vënë në dijeni numrin 1 të klubit. Por Scaroni sipas “Milannews.it” telefonoi menjëherë teknikun, i cili ndodhet në ShBA, ku skuadra do të marrë pjesë në një turne dhe i uroi atij fat për sfidat e radhës.
Midis të dyve do të zhvillohet një takim kur ai të kthehet në Itali, por presidenti i “Djallit” ia bëri të qartë se Gattuso është pjesë thelbësore e ekipit.