Matej Delaç mund të quhet padiskutim një nga lojtarët me fatin më të çuditshëm në karrierën e tij. 25-vjeçari nga Bosnja por me origjinë kroate, prej tetë vitesh ishte në pronësi të ekipit londinez të Chelsea-t, por nuk ka arritur të luajë asnjë ndeshje me “blutë”. Kjo pasi autoritetet britanike nuk kanë pranuar t’i japin vizën e punës të nevojshme për të ushtruar aktivitetin e tij si futbollist në ishull.
Kjo i detyroi drejtuesit e klubit anglez që ta jepnin portierin e ri me huazim nëpër ekipe të ndryshme për plot 8 vjet, duke numëruar plot 9 klube gjatë kësaj periudhe.
Sot, Delaç i ka dhënë zyrtarisht fund aventurës së tij të çuditshme në Angli duke firmosur për ekipin danez Horsens. Britania njihet për procedurat e saj tejet burokratike në lidhje me lejet e qëndrimit, por mesa duket këtë herë ato kanë tejkaluar çdo imagjinatë.
