Vendimi i Mesut Ozil për t’u tërhequr nga kombëtarja e Gjermanisë ka befasuar trajnerin Joachim Low, i cili aktualisht ndodhet me pushime në Sardenjë.
Ai u habit kur pa postimin e mesfushorit që deklaronte fundin e aventurës me përfaqësuesen. “As trajneri i kombëtares, as unë dhe as pjesëtarët e tjerë të stafit nuk dinim asgjë për këtë vendim dhe e mësuam si të gjithë të tjerët në internet” – deklaroi Harun Arslan, menaxheri i trajnerit të Gjermanisë, në intervistë për “Bild”.
Ozil tha se po tërhiqej si pasojë e sjelljes raciste dhe diskriminuese nga gjermanët, për shkak të origjinës turke dhe pikërisht Erdogan ka dalë në krah të fantazistit: “Kam folur me të në telefon. Vendimi i tij është patriotik, dua t’i puth sytë. E përkrah vendimin e tij. Gjermanët nuk arrijnë të pajtohen me faktet.”
