Nëse Cristiano Ronaldo transferohet te Juventus klubi italian absolutisht do përfitojë më shumë sa i përket marketingut, biletave e detajeve të tjera.
Gjithsesi edhe pse ende nuk ka asnjë konfirmim Juventus ka nisur të përfitojë nga ‘ylli’ portugez vetëm për shkak të thashethemeve. Këtë e konfirmon bursa e ditës së sotme e cila konstaton se aksionet e ‘zonjës së vjetër’ kanë pësuar rritje të ndjeshme vetëm si pasojë e mundësisë se fituesi i 5 herë “Topit të Artë” mund të transferohet në Torino.
Mediat italiane shkruajnë se në bursën e Milanos aksionet kanë pësuar një rritje prej 5,89%, ndonëse siç u tha më sipër nuk kanë asnjë garanci që marrëveshja në fund të realizohet.
Në fakt sinjalet e para u dhanë që ditën e djeshme kur aksionet e klubit bardhezi e mbyllën me +3,2% praninë në bursë, në atë që ishte rezultati më i mirë i Juventusit në katër muajt e fundit.
Sot, me përsëritjen e zërave dhe faktin se ato nuk u përgënjeshtruan nga palët, bursa ka pësuar një tjetër hov të rëndësishëm, duke vendosur një rekord të ri për Juventusin, i cili po përfiton në këtë mënyrë thjesht nga thashethemet rreth yllit portugez.