Chelsea po bën një rezistencë të fortë për të refuzuar të gjitha ofertat për Marcos Alonso, teksa talenti spanjoll ka dalë si një shënjestër e merkatos për Atletico Madrid. Merkato në Angli është mbyllur që në fillim të muajit, por në Spanjë do të mbyllet më 31 gusht dhe kjo i bën vulnerabël ekipet e Premier League.
Atletico është gati të bëj një ofertë të majme për Alonso, që t’i jap 27-vjeçarit postin e mbrojtësit të majtë, duke qenë se braziliani Felipe Luis është pranë kalimit te Paris SG. Alonso, ashtu si ka treguar edhe në dy javët e para të kampionatit, është bërë një pikë kyçe për trajnerin e ri Maurizio Sarri.
Ai ka lindur në Madrid dhe e filloi karrierën me Real, përpara se të shkonte te Bolton në vitin 2010 dhe më pas te Fiorentina në vitin 2013. Mëngjarashi, që ka luajtur edhe me Sunderland, u kthye në Premier nga Conte, në vitin 2016 dhe që atëherë është konfirmuar si një nga mbrojtësit më të mirë të planetit. Ai ka fituar titullin dhe Kupën e Anglisë me “blutë”.
Atletico është gati të ofrojë deri në 45 milionë euro, por “Daily Mail” shkruan se Chelsea nuk ka ndërmend ta pranojë.