Ndërsa Interi po pret që të transferojë Luka Modric-in, nga Anglia nuk vijnë lajme të mira. Blutë e Londrës do të përforcohen me një futbollist si Mateo Kovacic, i cili ia ka dalë më në fund që të bindë Real Madridin që ta lërë të lirë. Gazeta spanjolle “Marca” shkruan se mesfushori kishte kërcënuar “galaktikët” se ai nuk do të dilte në fushë që të stërvitej me grupin dhe se dëshironte që të lihej i lirë.
Kovacic kërkon më shumë minuta në fushë dhe te Reali sipas tij kjo nuk ishte e mundur. Trajneri Julien Lopetegui u përpoq që t’ia ndryshonte mendimin, por kroati nuk e ndryshoi qëndrimin. Nisur nga kjo, akordi me blutë e Londrës u gjet. Ai do të huazohet për një vit, e më pas klubi anglez do të ketë të drejtën e blerjes. Gjithçka është e mbaruar tanimë, e pritet vetëm zyrtarizimi.
Por largimi i Kovacic e bën edhe më të domosdoshëm qëndrimin e Luka Modric-it në “Bernabeu”. Presidenti Florentino Perez do të ketë nj arsye më shumë që të refuzojë largimin e futbollistit tjetër kroat për në Milano. Ky i fundit po përpiqet shumë, madje edhe menaxherët e kanë shtuar presonin, por deri më tani nuk ka asgjë konkrete. Gjithashtu duhet përmendur fakti se Kovacic shikohej si një alternativë tek Interi, në rast se Modric nuk do të vinte. Në të tillë situatë, gjithçka duket më e komplikuar tek Interi.
