Thomas Strakosha është padyshim një nga portierët më të mirë në qarkullim. Shqiptari ka një rritje shumë të madhe falë ekipit të Lazios. Shtatlarti nuk e nisi mirë karrierën, pasi kur e pati mundësinë të ishte titullar i Salernitanas nuk u paraqit në lartësinë e duhur. Rikthimi te Lazio e futi në shina, ndërsa tani ekipi kryeqytetas ka gjetur një “xhevahir”. Titullar i rëndësishëm dhe idhull i tifozerisë.
Të enjten, “gardiani shqiptar” nuk ka kaluar një mbrëmje shumë të qetë. Ai ka darkuar te restoranti i famshëm japonezo-brazilian, “Zero 21” dhe aty është ngacmuar nga tifozët e Lazios. Ata e kanë pyetur nëse ekipi do të shkojë në Champions League këtë sezon, ndërsa përgjigjja e Strakoshës ka qenë e drejtpërdrejtë. “Po, i kemi kualitetet për të shkuar në Champions. E kemi si detyrim“.
Sezonin e kaluar, Lazio nuk arriti të kualifikohej në Champions League në ndeshjen e fundit. Ekipi lacial humbi kundër Interit në një sfidë me shumë emocione. Portieri fitoi vendin e titullarit dhe në kombëtaren e Shqipërisë duke ulur në stol Etrit Berishën. Ai ishte “heroi” në fitoren kundër Izraelit, pasi u paraqit mjaft mirë. Në takimin kundër Skocisë nuk ishte në lartësinë e duhur, pasi pati përgjegjësi te goli i dytë i ishullorëve. 23-vjeçari gaboi në dalje duke e lënë portën e zbrasur.
