Një sulmues si Hamdi Salihi do të na bënte shumë punë në këto kohëra, por shkodrani tashmë e ka mbyllur me kombëtaren dhe po luan vitet e fundit të karrierës në Austri, te Wiener Neustadt. Gjithsesi, zemra e Salihit mbetet në Shqipëri dhe sot ishte në Elbasan, për të ndjekur sfidën e Shqipërisë kundër Izraelit, mbyllur me një fitore të shkëlqyer për kuqezinjtë. Pas ndeshjes Salihi u ndal nga gazetarët e pranishëm për të dhënë mendimin e tij për atë që pa në fushë dhe për të ardhmen e kuqezinjve.
Fitore e çmuar: “Më vjen mirë që u rikthyem te rezultati që kishim nevojë, shpresoj të jetë ogur i mirë për vazhdimësinë. Duhet të qëndrojmë me këmbë në tokë dhe kemi një motiv për besim, si sot”.
Disa të rinj shkëlqyen: “Më pëlqen guximi i trajnerit për t’u dhënë formacionin disa lojtarëve të rinj dhe besoj se të gjitha ia shpërblyen dhe e justifikuan. E ardhmja duket e mirë, shpresoj të kemi edhe fatin me vete”.
E ardhmja duket pozitive: “Së pari kemi të rinj shumë të mirë dhe së dyti kemi një trajner që beson shumë tek ta, gjë që është shpresëdhënëse për të ardhmen. Fillimi ishte i mbarë, por le të shohim te ndeshja e dytë, sepse është kthyer besimi”.
Shkodranët, si gjithmonë protagonistë në sulm: “Shqipëria do të ketë gjithnjë shkodranë në sulm”.
Në Skoci për pikë të arta: “Të shohim ndeshjen e dytë, është Skocia përpara, duket të qëndrojmë me këmbë në tokë”.
Ecuria në Austri: “Jemi në fazë rindërtimi te Neustadt dhe besoj se edhe këtë vit do të jemi konkurrues. Shpresoj të ngjitemi në Bundesligë. Jam i lumtur në Austri, është vendi ku gjithnjë kam kaluar momente të mira”.