Mesfushori i kombëtares shqiptare, Eros Grezda, bëri hapin e madh në karrierë duke kaluar nga Osijek-u në ligën e parë kroate drejt Rangers-it në kampionatin skocez të futbollit. Shqiptar do ta ketë të vështirë përshtatjen në kampionatin ishullor dhe për shkak të konkurrencës së madhe që ka në skuadër. Dëmtimi që pësoi dhe e mbajti gjatë jashtë fushave ka ndikuar në minutat e tij në fushën e lojës, pasi 23-vjeçari nuk është ende në formën e tij më të mirë. Dy ndeshjet e fundit me Shqipërinë ndaj Jordanisë dhe Izraelit e treguan qartë se lojtari ka probleme fizike.
Futbolli ndonjëherë është dhe çështje fati. Shqiptari mund të buzëqeshë fshehurazi me dëmtimin e shokut të tij të ekipit, Scott Arfield. Ky i fundit titullar i rëndësishëm në formacionin e Steven Gerrard dhe i afruar prej legjendës në merkaton e verës nga Burnley. 29-vjeçari është rivali direkt i Grezdës për formacionin e ekipit të Rangers-it. Arfield ka pësuar një dëmtim muskulor me kombëtaren e tij të Kanadasë. Ai rrezikon 3 ndeshjet e ardhshme të ekipit skocez.
Një nga tifozët e Rangers-it shkruan se me dëmtimin e Arfield mund të jetë momenti i duhur për të parë Grezdën në fushë
Një dhimbje koke për Gerrard, por për Grezdën është një mundësi e mirë për të fituar minuta dhe pse jo të luajë si titullar për herë të parë. Tifozët e Rangers-it i kanë kërkuar trajnerit anglez që të aktivizojë mesfushorin shqiptar nga minuta e parë. Gerrard ka besim te aftësitë e shqiptarit, prandaj e ka blerë, por gjendja e tij fizike mbetet ende shqetësimi kryesor i tij. Gjakovari duhet ta shfrytëzojë si duhet shansin e tij dhe të bindë se meriton më shumë.
