Arbitrimi i Milorad Maziçit, arbitrit serb që pati mundësinë të drejtojë finalen e fundit të Champions-it mes Realit të Madridit dhe Liverpulit. Nën akuzë përfundojnë prekja me dorë e portierit Handanoviç, që tërboi të gjithë stadiumin, por edhe starti i aksionit të golit të barazimit të Naingolanit. Ja të gjitha episodet:
* Minuta 18 – Protesta të Interit për një markim të Vierxhever ndaj Ikardit në limitet e zonës së PSV-së. Arbitri dhe anësori nuk shohin asgjë të parregullt dhe lejojnë avantazhin, por ndoshta mund të kishte një faull për zikaltrit nga distanca e 20 metrave.
* Minuta 40 – Handanoviç del në mënyrë të dëshpëruar nga porta, për të ndalur Berguijn në të djathtë të zonës së rreptësisë. Lojtari i PSV-së është i lëshuar në rrjetë, por topi me të cilin driblon sllovenin preket me dorë nga ky i fundit, duke ndërprerë një aksion për gol. Arbitri Maziç, në vend të të kuqit vendos për të verdhin, duke mos e quajtur një rast të pastër për gol, duke qenë që edhe tre mbrojtës zikaltër po hynin në zonën e tyre. Ky vendim tërbon stadiumin dhe trajnerin Mark Van Bomel në pankinë. Vendim shumë i diskutueshëm.
* Minuta 44 – Në golin e barazimit të Naingolan, shumë dyshime mbi pozicionin e nisjes së Ikardit, pas goditjes së Azamoah, që grushtohet nga portieri Zoet. Nga pamjet, argjentinasi duket më i avancuar sesa mbrojtësi i fundit i PSV-së, por duke mos pasur VAR, arbitrat në dyshim e sipër lejuan avantazhin, për festën e Interit. Shumë i diskutueshëm edhe ky vendim.
* Minuta e 60-të – Shumë i rregullt goli i avantazhit të Ikardit, që përmbys rezultatin për Interin në Eindhoven. Kapiteni i italianëve niset në pozicion të rregullt.
