Milan ka qenë shumë afër Sergej Milinkovic-Savic. Kjo është prapaskena e zbuluar nga “Corriere della Sera” në prag të sfidës që kuqezinjtë do të luajnë të dielën kundër Lazios në “Olimpico”.
Gjithçka ka ndodhur në orët e fundit të merkatos së verës, më saktësisht natën mes 16 dhe 17 gushtit, dita e mbylljes së transferimeve për Serinë A.
Sipas të përditshmes italiane, presidenti Lotito ka marrë një telefonatë nga një drejtues i Milan, që i ka ofruar 120 milionë euro: 30 milionë për huazimin, plus 90 të tjerë për blerjen përfundimtare të kartonit të lojtarit.
Numri një i bardhekaltërve është menduar fillimisht, por më pas ka refuzuar. Arsyet e refuzimit kanë qenë pamundësia për ta zëvendësuar serbin dhe premtimi që i ka bërë trajnerit Inzaghi për të mos e shitur mesfushorin.
