Trajneri i ri Lirisë në kampionatin e Kosovës, Vincenzo Alberto Anesse e ka marrë seriozisht punën te ekipi i qytetit të Prizrenit. Pasi u prezantua ditën e hënë, italiani e ka nisur seancën e sotme stërvitore duke u bërë “zbor” lojtarëve të tij. Sipas medias “Zëri”, Anesse i ka detyruar lojtarët të vrapojnë përgjatë qytetit deri në qendër të Prizrenit. Pasi i ka “sfilitur”, ai i urdhëroi futbollistët të stërviteshin në shkallët e stadiumit “Përparim Thaçi”.
Ai ka një mision tepër të vështirë, pasi duhet ta largojë skuadrën nga zona e rrezikshme e rënies nga rangu më i lartë i futbollit të Kosovës. Liria renditet në vendin e dhjetë me 16 pikë, 2 më pak se Ferizaj i vendit të parafundit, pozicion që e zbret një kategori më poshtë.