Portieri i Kombëtares së Anglisë, Jordan Pickford, është i njohur për saktësinë e tij në pasime të gjata, megjithatë tani ai e ka dëshmuar se është i talentuar edhe për shënimin e golave nga pozicione shumë të vështira.
Faqja zyrtare e Kombëtares së Anglisë e ka publikuar në Twitter një video ku shihet goli i mrekullueshëm që Pickford arriti ta shënojë nga këndorja, gjatë një seance stërvitore me Kombëtaren.
Edhe gjatë turneut të Kupës së Botës në Rusi, Pickford e kishte dëshmuar aftësinë e tij për të qenë shumë i saktë në gjetjen e lojtarëve përmes pasimeve të gjata, që është edhe arsyeja kryesore pse trajneri Gareth Southgate e preferon atë aq shumë.
Pickford është larguar për dy javë nga klubi i tij, Everton, për t’u bashkuar me Kombëtaren e Anglisë.
Ai pritet të luajë për “Tre Luanët” në ndeshjen e nesërme kundër Shteteve të Bashkuara të Amerikës dhe të dielën kundër Kroacisë.
