Duhet ende edhe një muaj që të bëhet publik emri i fituesit të Topit të Artë, por votat e personave që kanë të drejtë votimi kanë kohë që janë kryer dhe ka nisur numërimi i tyre. Dhe, sipas një informacioni që është bërë publik sot në të përditshmen britanike “The Sun”, surprizat janë të shumta. Gazetari francez i RF1, Eric Mamruth, ka bërë publike në faqen e tij zyrtare “Twitter” disa informacione “top secret” në lidhje me rezultatin e votimeve, ndërkohë që sipas tij është numëruar gjysma e votave.
Surprizat janë të shumta, pasi në listën e “top-3” finalistëve nuk janë as Lionel Messi e as Cristiano Ronaldo, dy futbollistët që kanë diktuar 10 vitet e fundit, me nga 5 fitore secili. Çka do të thotë që epoka e dy fenomenëve të futbollit ka përfunduar. Madje nuk është as sulmuesi Antoine Griezmann. Ata kanë marrë mjaft vota, por jo mjaftueshëm për t’u ngjitur në 3 vendet e para, ku ndodhen 3 futbollistë të tjerë, të 3 finalistë të Kupës së Botës “Rusi 2018”.
EXCLUSIF #BallondOr : Après dépouillement de la moitié des votes, le trio de tête est le suivant: 1) Modric 2) @raphaelvarane 3) @KMbappe . Info @xbarretfoot @RFIRadioFoot @RFIsports
— Eric Mamruth (@MamruthRFI) November 9, 2018
Sipas informacioneve të bëra pubklike sot, në vendin e tretë ndodhet sulmuesi Kylian Mbappe, një nga favoritët për fitimin e Topit të Artë, por larg kreut, ku ndodhet kroati Luka Modric. Ky i fundit mori edhe trofeun “The Best” pak kohë më parë dhe shihet si kandidati kryesor për fitimin e Topit të Artë, ndërkohë që mes tyre ndodhet një tjetër francez, Raphael Varane. Mbrojtësi i Real është i vetmi që këtë vit ka fituar si Champions League ashtu dhe Kupën e Botës. Ndoshta pas 12 vitesh do të jetë sërish një mbrojtës ai që do të fitojë Topin e Artë, i fundit Fabio Cannavaro, pas triumfit në Botërorin gjerman.
