Një nga njerëzit që duhen falënderuar për zbarkimin e Leo Messi-t në Europë është Carles Rexach, zëvendë strajneri i Barcelona-s në vitin kur argjentinasi është transferuar te ekipet e moshave të katalanasve. Me kalimin e viteve, “Pleshti” ka fituar eksperiencë te Barça C fillimisht, më pas te skuadra e dytë, për të arritur më pas tek ekipi i parë në 2004-ën.
Rexach ishte larguar nga klubi në atë kohë, por vlerësimi i tij për Messi-n nuk ka ndryshuar aspak dhe ai ka qenë i pranishëm në ceremoninë e dhënies së Këpucës së Artë të radhës të fituar nga Leo Messi. Por, Rexach ka bërë polemikë para dhënies së çmimit.
I pyetur në lidhje me një krahasim mes Këpucës së Artë dhe Topit të Artë, ai ka thënë se: “Shumë njerëz nuk do të jenë dakord, por unë preferoj pesë Këpucë të Artë sesa pesë Topa të Artë. Golat janë shënuar dhe askush nuk mund ta mohojë. Ndërsa, Topi i Artë është një votim dhe pas këtyre votave fshihen interesa të tjerë. Është më i manipulueshëm”.
Është e qartë se kjo deklaratë i referohet faktit se i preferuari i tij, Leo Messi, nuk ka qenë as mes tre më të mirëve. Gjë kjo që ka qenë e vështirë të shpjegohet nga pjesa më e madhe e sportdashësve. Por, Rexach ka vazhduar duke bërë një krahasim mes futbollit dhe një disipline tjetër sportive. Ashtu si Messi dhe CR7 në futboll, çmimi i lojtarit më të mirë në tenis mund të dominohet nga dyshja Nadal-Federer.
“Në tenis njerëzit mund të diskutojnë se kush është më i mirë mes Federer dhe Nadal, por në fund ka një pikësim që tregon se kush është numri një. Në futboll është më e vështirë, sepse është një sport skuadre, por duhet sqaruar se sa vlen një kampionat, një Champions dhe një Botëror”.
Një gjë është e sigurt, ata që e duan futbollin e dinë mirë se një lojtar si Messi meriton të fitojë shumë çmime dhe do të fitojë shumë të tillë në të ardhmen.
