Interi është në një moment të zi, duke garuar me Milanin se cili klub ka më shumë halle në këtë moment.
Klubi zikaltër ende po vajton eliminimin e hidhur nga Champions League, ndërsa po sheh t’i shembet kështjella e ndërtuar me shumë mundim në verë, për faj të një trajneri që nuk po gjen zgjidhjet e duhura për të dalë nga kriza dhe të një skuadre të çoroditur, që ndoshta tani po e kupton se nuk vlente aq shumë sa mendohej në verë.
Pas barazimit dëshpërues kundër Chievo-s së vendit të fundit, Interi është përballur edhe me një problem tjetër, që nuk është i ri në fakt.
Radja Nainggolan është paraqitur sërish me vonesë në stërvitje dhe kjo ka bërë që të sosë durimi, me drejtuesit e klubit që kanë marrë një vendim drastik: pezullim i përkohshëm nga aktiviteti dhe gjobë.
Mesfushori belg do të vijojë të stërvitet, por nuk do të grumbullohet për ndeshjen e radhës ndaj Napolit. Në verë Interi e bleu me shpresën se do të përforconte jashtëzakonisht një mesfushë që ka nevojë për cilësi e mushkëri, por duket se biznesin më të mirë e ka bërë Roma, që e hoqi qafe, sepse mesfushori belg është një ‘mistrec’ i pandreqshëm.
Comunicato FC Internazionale Milano
👉 https://t.co/F1Kz9nveon #FCIM
— Inter (@Inter) December 23, 2018
