Biznesmeni i famshëm nga koha e Ferrarit, Luca Cordero di Montezemolo, foli jo vetëm për F1, por zbuloi edhe një detaj të veçantë mbi Cristiano Ronaldo. I çuditur nga paraqitjet e portugezit me fanllën bardhezi, Montezemolo komenton: “Po paraqitet shumë mirë. Në fillim qeshja dhe tallesha, sepse nuk e nisi në mënyrën më të mirë të mundshme. Zhvilloi dy apo tre ndeshje pa shënuar gol dhe pyesja veten se çfarë po i ndodhte. Por tani është rikthyer Ronaldo i përhershëm. Shënon edhe kur futet në fushë për vetëm pesë minuta nga pankina. Pastaj është edhe një djal në rregull”.
Në fakt Montezemolo ka rrëfyer edhe një episod nga e kaluara që lidhet me Ronaldon. “Mbaj mend që mora një çmim nga e përditshmja spanjolle ‘Marca’ dhe ai më bëri një surprizë. Erdhi për të më bërë komplimentet e tij në redaksi. Ky veprim la pa fjalë edhe gazetarët aty. Është një djalosh i përkushtuar, i përqendruar, korrekt, që jep gjithçka në fushë. Më pëlqen”, deklaroi Montezemolo.
