Vetëm pak javë pasi trajneri i Leeds United, Marcelo Bielsa bujshëm pushtoi mediat botërore sportive me historinë e tij të spiunazhit, pas kapjes në flagrantë të një të dërguari të tij teksa përgjonte fshehurazi rivalët në Championship, Derby County, La Liga është tronditur nga një skandal i ngjashëm ‘spygate’.
Spiuni që punon për Valencian u largua plot buzëqeshje nga “Mestalla Stadium” dhe pas një udhëtimi 3 orë me tren, ‘Amunt’ kishte mbërritur në kompleksin stërvitor të Barcelonës. Me klubin që i kishte besuar detyrën e rëndësishme për ta informuar mbi lëvizjet e kundërshtarit para përballjes së të shtunës, Amunt nuk mund të kthehej në shtëpi duarbosh.
Pas qëndrimit për një orë i fshehur mes shkurreve që rrethonin kompleksin stërvitor, lakuriqi i natës prej pellushi arriti të zbulojë dhe të mbajë shënim: Messi është i mirë. Për të ardhur keq ishte fakti që në fund Barcelona zbuloi gjithçka dhe tha fjalën e fundit në gjithë këtë mision gazmor.
