Kastrioti nuk e ka prioritet Kupën, sepse është një skuadër që objektiv primar ka mbijetesën. E megjithatë, skuadra krutane ka qenë shumë më dinjitoze në ndeshjet miqësore te zhvilluara gjatë muajit janar se sa në ndeshjen e djeshme me Partizanin që përfundoi me rezultatin 4-2, e vlefshme për turin e dytë të Kupës.
Vendësit kanë pësuar dy gola naivë, që duke iu referuar realitetit shqiptar, të ngjallin edhe dyshime. Goli i dytë nga Mensah dhe i treti i realizuar nga Trashi, që kanë përmbysur rezultatin fillestar, janë të denjë për humor sportiv. Në golin e parë Mensah është duke vrapuar drejt zonës dhe në vend që lojtarët e Kastriotit t’i afrohen dhe ti zënë rrezen ata i largohen duke e lënë ballë për ballë me portierin.
Ndërsa goli i tretë, ai i Trashit, lojtarët e Kastriotit shohin si spektatorë se çfarë ndodh në zonën e tyre, ndërkohë që Trashi gjuan njëherë dhe pasi nuk shënon dot, ka luksin të gjuajë prapë deri sa të shënojë gol. Kujtojmë që nga Kastrioti u largua trajneri Nica duke hedhur akuza të forta se lojtarët i pësonin humbjet kur donin ata.
Drejtuesit e klubit krutan nuk mbajtën asnjë qëndrim, thjesht u mjaftuan duke e zëvendësuar Nicën me Devollin. Ky i fundit nuk ishte në stol dje për shkak procedurash, por si ndeshje debutuese, padyshim që nuk kishte asgjë nga ato që mund ta bëjnë krenar një trajner. Përkundrazi…