Superkupa e Italisë mes Juventusit dhe Milanit, që u vendos nga goli i Cristiano Ronaldos duke i dhënë trofeun bardhezinjve, i teti në histori, ka vijuar me polemika të shumta. Pala kuqezi ka akuzuar për një arbitrim të favorshëm karshi “Zonjës” dhe kryesori Banti dhe ndihmësit e tij nuk kanë kaluar pa u vënë re nga tifozeria kuqezi.
Rasti ka qenë në aeroportin e Xhedah, siç edhe shkruan “Milan Neës”, me të dërguarin në Arabi Saudite. Në momentin që klasa arbitrare po i afrohej aeroportit dhe drejtohej Gate për t’u ngjitur në avion, tifogrupi kuqezi “Curva Sud”, që ndodhej aty, bërtiti me të madhe: “Hapni rrugën, erdhi Juventusi!”. Një fjali ironike kjo, drejtuar sigurisht arbitrave për mënyrën se si e mbajtën takimin, me disa episode për t’u rishikuar.
