Kanë folur të gjithë, por jo lojtari. Fiorin Durmishaj mund të konsiderohet “de facto” futbollist i kombëtares greke, ndonëse “de jure” është ende një kontingjent për Kombëtaren Shqiptare të Kristian Panuçit.
Mirëpo, teksa tashmë është bërë faktike lëvizja e federatës greke dhe përfaqësuesve të kombëtares helene, mësohet edhe mënyra se si e kanë bindur sulmuesin me origjinë vlonjate që të braktisë Shqipërinë për të vijuar karrierën si pjesë e kombëtares greke.
PRAPASKENA
Nga burime të besueshme pranë futbollistit mësohete mënyra se si e ka bindur pala greke që të thotë “po”. Trajneri i kombëtares së Greqisë, Angelos Anastasiadis, ka qenë njeriu kyç që ka bërë të mundur nisjen e kësaj çështjeje. Duke ndjekur shpesh futbollistin, ai e ka kontaktuar Durmishajn dhe e ka bindur se me të në krye të përfaqësueses, shqiptari do të ishte në qendër të projektit.
Trajneri i ka premtuar Durmishajt hapësira dhe vëmendje maksimale, duke mos e diskutuar formacionin dhe se do të jetë zgjedhja e tij e parë për sulmin. Kjo gjë duket se ka bindur qendërsulmuesin që të pranojë Greqinë dhe më pas, presioni i menaxherit ka faktuar gjithçka.
FIFA
Në mediat greke është bërë me dije se çështja “Durmishaj” do të niset në FIFA gjatë ditës së sotme. Përfaqësuesit e federatës greke të futbollit, pasi kanë plotësuar dokumentacionin e nevojshëm që nis me një kërkesë dhe dëshmi të vetë lojtarit dhe menaxherit të tij për ndërrimin e kombëtares, do t’i drejtohen FIFA-s për të marrë të drejtën që Durmishaj të regjistrohet si futbollist i kombëtares greke.
Në mediat greke, gjithashtu raportohet se në këtë dosje, mungon vetëm dokumenti nga Federata Shqiptare e Futbollit, që lejon Durmishajn të luajë me një përfaqësuese tjetër, duke qenë se sulmuesi është aktivizuar në Kombëtaren U-21 të Shqipërisë. Mirëpo, gazeta është interesuar pranë FSHF-së, dhe nga burime jo zyrtare bëhet me dije se akoma nuk ka ardhur një kërkesë e tillë.
MANOVRA
FSHF nuk ka asnjë mundësi që ta bllokojë Durmishajn në këtë nismë që ai ka ndërmarrë. E vetmja gjë që mund të bëjë, është ta zvarrisë dhe zgjasë sa më shumë përgjigjen zyrtare drejt federatës helene.
Kjo gjë do të pengonte vetëm grumbullimin e Durmishajt me Greqinë në ndeshjet e muajit mars, por në qershor do të ishte i lirë për t’iu bashkuar grekëve. E gjithë kjo, pasi kryesorja në këtë lëvizje është vullneti i lojtarit.
