Është mbyllur në barazim 1-1 supersfida mes Interit dhe Romës e vlefshme për javën e 33-të të Serisë A. Të dy skuadrat nuk kanë përfituar nga hapi fals i Lacios dhe Milanit në mesditë për të thelluar diferencën në “luftën” e një vendi që të dërgon në Champions sezonin e ardhshëm.
Skuadra e Ranierit kaloi e para në avantazh me anë të El Sharauit, i cili realizoi një supergol nga distanca. Pjesa e parë mbyll me fitoren e Romës, ndërkohë që në minutën e 61-të, zikaltërit gjetën golin e barazimit me anë të Perisiç, i cili goditi saktë me kokë nga brenda zonës, pas asistit të Dambrosios. Pavarësisht përpjekjeve, rezultati mbeti i barabartë deri në fundin e takimit.
Me pikën e sotme, Interi u ngjit në kuotën e 61 pikëve, ndërkohë që Roma është pozicionuar në vendin e 5-të me 55 pikë, 1 më pak se Milani i vendit të 4-t. Pritet një “luftë” e ashpër deri në fund të kampionatit për sa i përket zonës Champions. Në sfidën e radhës Interi do të presë Juventusin, ndërkohë që Roma luan në shtëpi ndaj Kaljarit.
