Barcelona do të duhet të përgatitet gradualisht për një jetë pa Leo Messi-n. Lojtari më i mirë i të gjitha kohërave i klubit spanjoll është drejt fundit të karrierës dhe katalanasit pritet të kenë disa vështirësi pas largimit të tij. Gjithsesi, ky problem do të shmangej nëse ata do ta zëvendësonin argjentinasin me një lojtar me cilësi të përafërta me të.
Sipas “Diario Gol”, Barça duket se i ka kërkuar Messi-t që të zgjedhë atë që mund të jetë pasardhësi i tij në “Camp Nou” dhe përgjigjja e “Pleshtit” ka qenë: Kylian Mbappe. 20-vjeçari ka shënuar mbi 100 gola në karrierën e tij, duke treguar se është një vrasës para portës, por problemi i Barçës është se Real Madrid është i gatshëm të ofrojë më shumë se ata për francezin.
Për më tepër, “Los Blancos” besojnë se Zinedine Zidane do të ndikojë në vendimin e Mbappe, por nuk duhet nënvlerësuar as ndërhyrja e mundshme e Leo Messi-t. Pavarësisht nga këto, dy gjigantët e Spanjës do të sfidohen për shërbimet e yllit të ri gjatë vitit 2021, kur skadon edhe kontrata e tij me PSG-në, që nuk e shet për më pak se 300 milionë euro në këtë moment.
Vlera aktuale e sulmuesit, sipas Transfermarkt, është 211 milionë euro.
