Kur Mançester Junajtid i besoi sigurinë e tre trofeve të tripletës historike pas paradës së autobusit të hapur në 1999, Albert Morgan bëri atë që do të bënte çdo magazinier.
“I lashë në lavanderi”, thotë Morgan, i cili u rikthye në “Old Trafford” me autobusin e boshatisur përpara se t’i “hidhte” tre kupat më të famshme në botë mes rrobave të palara nga fitorja e Junajtid ndaj Bajernit në finale.
“Isha vetëm unë dhe trofetë. I futa mes rrobave dhe isha i kënaqur që po shkoja në shtëpi”, tregon magazinieri, i cili punoi për 20 vite gjatë epokës së Fergusonit. “Makina ime ishte në ‘Old Trafford’ dhe ne ishim absolutisht të sfilitur. U tundova t’i fus në bagazh dhe t’i marr me vete në shtëpi, por mendova se mund të kisha fatin e keq që të më vidhnin shtëpinë atë ditë dhe ato të zhdukeshin. Kështu që u tregova i mençur një herë të vetme dhe ato qëndruan aty, mes rrobave të pista në lavanderi”, tregon Albi për historinë e 20 viteve më parë.
Lot në sytë e Morganit atë mbrëmje në “Camp Nou”: “Shpresojmë ta bëjmë sërish, por nga ana tjetër nuk dua dikë tjetër ta përsërisë. Është diçka unike dhe dua të jem pjesë e saj. Po kërceja në dhomën time kur Siti u eliminua nga Totenhemi në Champions”, thotë tashmë ambasadori i klubit, i cili do të rikthehet në “Old Trafford” në ish-rolin e tij kur Junajtid të rindeshet me Bajernin për të përkujtuar atë ndeshje të dielën, ekzaktësisht një ditë pas datëlindjes së tij të 73-të. Ai u tërhoq pas 20 vitesh në këtë detyrë në 2013 së bashku me Sër Aleks.
Morgan tregon edhe detaje të punës së tij me lojtarët: “Kantona ishte supersticioz dhe vishte të njëjtat çorape të bardha ose të zeza dhe i spërkaste me kripë. Askush nuk e pyeste kurrë përse. Për vite me radhë mbaja orën ‘Rolex’ të Shmajkëllit në dorë. Nuk e di pse ma jepte përpara çdo ndeshjeje. Në fund, kur mbylli karrierën me Junajtid pas ndeshjes me Bajernin, ma dhuroi dhe unë e kam ende. Tregoi gjithë klasin e atij njeriu”.
