Ky sezon mund të konsiderohet i mbyllur për Realin e Madridit, teksa “galaktikët” do të kërkojnë ta harrojnë sa më shpejt.
Dështimet e këtij sezoni janë të njëpasnjëshme, ndërsa fillimisht e nisën sezonin me trajnerin Lopetegui, për të vazhduar më pas me Solarin, teksa së fundmi stoli i është besuar sërish Zidane, i cili e ka provuar se ka qenë i suksesshëm.
Ndërkohë, eliminimi nga Champions mund edhe të tejkalohet pas triumfeve të tre viteve të fundit, por situata në kampionat ishte e rëndë, ndërsa ekipi nuk rivalizoi për asnjë moment me Barcelonën.
Në sfidën e djeshme Reali u mposht sërish këtë herë nga Real Sociedad, e cila përkoi të ishte dhe disfata e 17-të sezonale në të gjitha kompeticionet.
Një rekord historik negativ që nuk regjistrohej prej 20 viteve. Tashmë “Los Blancos” duhet të mendojnë për afrime cilësore në merkato, për të rikthyer edhe njëherë ekipin kompetitiv në sezonin e ardhshëm.
