Shumë kolegë të tij, por edhe personalitete nga fusha të tjera, e kanë treguar përjetimin në golin e tretë të Messit ndaj Liverpool, shënuar mbrëmë në gjysmëfinalen e parë të Ligës së Kampionëve, përmes reagimeve në rrjetet sociale. Më pikanti ishte ai i Mario Balotellit, por jo vetëm. Reagimet më të nxehta e shpërthyese kanë ardhur në kohë reale nga komentatorët televizivë, ose radiofonikë, që po përcillnin “live” gjithçka për teleshikuesit dhe dëgjuesit.
Spanjollja “AS” ka publikuar njërin prej tyre (audio), pa përcaktuar emrin konkret të komentatorit radiofonik, por “piskama” e tij është drithëruese. “Ole”-ja është kaq e gjatë, sa mund të ketë thyer rekord në mbajtjen e frymës… Mes shpërthimit tejet emocional, me të bërtitura të “çmendura”, dëgjohet edhe përcaktimi pikant, që i bëhet yllit të Barcelonës: “Shëmbëlltyra e Zotit!”
