Hakim Ziyech dhe Noussair Mazraoui ishin duke agjëruar gjatë ndeshjes së mbrëmshme gjysmëfinale të Ligës së Kampionëve kundër Tottenhamit. Shumë myslimanë – përfshirë këtu edhe dy yjet e Ajaxit, Hakim Ziyech dhe Noussair Mazraoui – janë duke e agjëruar muajin e Ramazanit. Dyshja e klubit holandez luajti mbrëmë në gjysmëfinale të Ligës së Kampionëve kundër Tottenhamit, megjithatë agjërimin nuk e ndërprenë. Ata agjëruan edhe në fushën e lojës, deri në minutën e 24-të të ndeshjes, kur bënë iftar.
Në minutën e 24-të të ndeshjes bënë iftar dhe Ziyech e shënoi golin e dytë të Ajaxit vetëm 11 minuta pasi hëngri bukë dhe piu ujë. Rrugëtimi i Ajaxit në këtë sezon të Ligës së Kampionëve ka qenë i jashtëzakonshëm. Përkundër që futbolli në Evropë është i zhytur në transferime shumë të shtrenjta dhe paga të larta, klubi holandez e arriti gjysmëfinalen me lojtarë të rinj dhe të lirë.
Skuadra e Erik ten Hag e mposhti edhe Juventusin, edhe Real Madridin, në rrugëtimin e tyre prej katërshes së fundit të Ligës së Kampionëve, mirëpo mbrëmë ata u eliminuan nga Tottenhami në një tjetër natë magjike në Evropë. Tifozët e Ajaxit u dhanë kundërshtarëve të tyre duartrokitje të gjatë dhe mjaft të zhurmshme, përkundër që sapo e kishin përjetuar një ndër momentet më tronditëse për klubin e tyre të preferuar.
Ajaxi e mbylli pjesën e parë duke fituar me rezultat 2:0, pasi golat e shënuara nga Matthijs de Ligt dhe Hakim Ziyech ia dha atyre epërsinë me rezultat të përgjithshëm 3:0. Mirëpo, skuadra e Mauricio Pochettinos i mblodhi forcat për pjesën e dytë të kësaj ndeshjeje dhe arriti ta sigurojë fitoren me rezultat 3:2, përkundër që kjo gjë dukej shumë e pamundur pas lojës në pjesën e parë.
Lucas Moura e shënoi një het-trik të paharrueshëm. Goli i tij i tretë, që ia siguroi londinezëve kualifikimin në finale të këtij sezoni të Ligës së Kampionëve, erdhi në minutën e 96-të të ndeshjes, vetëm disa momente para se të përfundonte ndeshja. Sapo gjyqtari e sinjalizoi fundin e ndeshjes, lojtarët e Tottenhamit ranë në fushë dhe Pochettino filloi të qante menjëherë pasi e përshëndeti trajnerin e kundërshtarëve, Ten Hag.
Tani, Tottenhami do të takohet me Liverpoolin në finalen angleze të Ligës së Kampionëve, e cila do të zhvillohet më 1 qershor në stadiumin e Atletico Madridit, “Wanda Metropolitano”.