Stephan El Shaarawy është një nga lojtarët më të spikatur te Roma dhe kjo ka bërë që ai të tërheqë vëmendjen e skuadrave të tjera.
Sipas mediave italiane, në gjurmët e sulmuesit ishte vënë Interi, i cili e sheh si zëvendësuesin ideal në rast largimi të Ivan Perisic.
Por, sipas asaj që shkruan sot “Corriere dello Sport”, Roma nuk dëshiron ta shesë lojtarin.
Drejtuesit verdhekuq i kanë ofruar 26-vjeçarit rinovimin e kontratës, e cila përfundon në vitin 2020.
Por ka një ngadalësim të negociatave, kjo për shkak se lojtari dëshiron rritje të pagës që merr aktualisht.
Marrëveshja për rinovimin e kontratës pritet të mbyllet së shpejti dhe lojtari do të fitojë 3 milionë euro, plus bonuse.
