Skënderbeu duket se ka filluar të mendojë seriozisht për sezonin e ardhshëm, pavarësisht pritjes së vendimit nga KAS-i i Lozanës. Në kushtet kur Gjykata e Arbitrazhit Sportiv ende nuk ka vendosur për vijimin e këtij klubi në Europë, kjo nuk i ka penguar drejtuesit që të planifikojnë skuadrën e re.
Prej kohësh korçarët ishin në ndjekje të mbrojtësit të Kastriotit, Lukman Husein, një preferencë e vetë presidentit Ardjan Takaj. Mësohet se bisedimet mes palëve janë në rrugë të mbarë. Mbrojtësi i djathtë është një garanci më shumë për ekipin dhe kjo duket se ka shtyrë bardhekuqtë që të shpejtojnë në tratativat me lojtarin.
Fakti që Kristi Vangjeli është larguar dhe rikthimi i tij në Korçë nuk ka garanci të madhe, edhe pse nga presidenca bëhet fakt i kryer, ka bërë të hidhen sytë nga një lojtar që nuk është më shumë se 22 vjeç. Husein ka spikatur me Kastriotin në sezonin e fundit në Superiore, duke luajtur 31 ndeshje dhe mbi të gjitha duke qenë një pikë kyçe e krutanëve në krahun e djathtë. Palët kanë biseduar, por nuk dihet se kur do të vijë zyrtarizimi i transferimit. Burimet në klub thonë se është gjetur gjuha e përbashkët për anën financiare, por ashtu si edhe për lojtarët e tjerë, kontratat do të bëhen zyrtare vetëm pas vendimit të KAS-it.
MERKATO – Në anën tjetër, duket sulmi do të jetë reparti ku Skënderbeu do të investojë më shumë këtë sezon. Me shifrat e ulëta të realizimit të golave në kampionatin që u mbyll, Takaj nuk mund të pajtohet dhe as trajneri i ri që do të marrë përsipër vazhdimin e projektit ““Skënderbeu”.
Burimet pranë skuadrës bëjnë me dije se vetë presidenti ka udhëzuar drejtuesit e merkatos dhe veçanërisht drejtorin teknik Haris Fakiç që të kërkojë element cilësorë në këtë repart. Kujtimi i Ali Soues është ende i freskët në Korçë. Pikërisht një profil i ngjashëm i sulmuesit goleador nga Gambia i mungon Skënderbeut dhe kjo është kërkesa parësore e presidentit. Për momentin nuk ka ndonjë emër në listën e dëshirave, por është e qartë se asgjë nuk do t’i lihet rastësisë. Fakiç po shikon disa alternativa në rajon, ndërsa nuk është çudi që sulmuesi i ri i Skënderbeut të jetë nga Kosova.
