Moti ishte një nga shqetësimet kryesore të trajnerit të Sherif Tiraspol gjatë konferencës së djeshme për shtyp. Me të drejtë, pasi sot në orarin e ndeshjes pritet që të ketë temperatura që shkojnë deri në 35 gradë celsius.
Jo vetëm kaq, por pritet që edhe lagështia e ajrit të jetë mbi 50%, ç’ka e bën ambientin “mbytës”. Për kundërshtarin e Partizanit sigurisht që është disfavor, ndaj mbetet për t’u parë nëse do ta shfrytëzojnë të kuqtë.
Ndryshe nga e shkuara në edicionet e fundit në Europë, për herë të parë Partizani e shikon veten favorit nga koeficientët e basteve që vendosin kompanitë ndërkombëtare.
Për ndeshjen ndaj Sherif Tiraspol, koeficientet janë në anën e “demave”, pasi fitorja e Partizanit vlerësohet 2.3. Barazimi e ka koeficientin 3.2, ndërsa suksesi i moldavëve në “Selman Stërmasi” vlerësohet me 2.7. “RTSH” do të transmetojë ndeshjen e të kuqve në Ligën e Europës.
