Java e tretë e Superiores do të na sjellë klasiken e futbollit shqiptar, mes Vllaznisë dhe Tiranës në “Loro Boriçi” të Shkodrës.
Por ndeshjet midis dy ekipeve më të vjetra të Shqipërisë në vitet e fundit janë prishur vazhdimisht nga konfliktet midis tifozëve.
Edhe kjo ndeshje si të tjerat ka filluar të japë shkëndijat e para në rrjetet sociale.
Në një postim të tifogrupit “Tirona Fanatics”, ku lajmëronin detajet e udhëtimit për transfertën e Shkodrës, ndër të tjera thuhej se udhëtimi do të ishte vetëm për personat +18 vjeç.
Ndërkohë, në këtë postim, një profil me emrin “Ultrasit Vllaznia”, replikon duke shkruar:
“Nuk keni pse të bëni transfertat +18 kur udhëtimi është në Shkodër, sepse ne nuk i bëjmë gjërat pabesisht sikur ju. Në Shkodër ju e dini mirë që gjërat i bëjmë midis qytetit dhe midis stadiumit .Forca Vllazni. Forca djemtë e Shkodrës”
Ky koment ka qëndruar në postimin e tifogrupit të Tiranës për disa minuta, dhe më pas është fshirë. Mesa duket, thumbat e para kanë nisur që në rrjetet sociale, dhe me interes pritet prania e tifozëve bardheblu në Shkodër.