Një fitore e madhe me përmbysje ajo e Atleticos së Madridit që në “Wanda Metropolitano” mposhti 3-2 Eibarin, edhe pse e pa veten në disavantazh të dy golave.
Me këtë sukses Los Colchoneros u ngjitën në kuotën e 9 pikëve pasi regjistruan fitoren e 3-të radhazi dhe e thelluan në 5 pikë avantazhin në renditje ndaj Barcelonës kampione në fuqi.
Atletico kryeson me pikë të plota 9 edhe pse të tre ndeshjet e këtij sezoni i ka fituar me rezultat minimal.
Charles dhe Arbilla i dhanë avantazhin e dyfishtë Eibarit në harkun e 19 minutave, por në të 27-ën erdhi goli i talentit Joao Felix me fanellën e Atleticos në një ndeshje zyrtare me portugezin që e kishte një lojë fëmijësh dërgimin e topit në rrjetë pas asistit perfekt të Diego Costës.
Në fillimin e pjesës Vitolo vetëm pak çaste pasi kishte hyrë në fushë barazoi shifrat ndërkohë që golin e fitores për Atleticon e realizoi një tjetër lojtar i ardhur nga stoli, Thomas, në minutën e 90-të pas një inkursioni personal.
Tashmë skuadra e El Cholos kryeson e vetme La Ligan me pikë të plota 9.