Interi kishte shfaqur interes në merkaton që sapo u mbyll, për të transferuar në skuadër lojtarin e Borusia Dortmund, Mario Gëce.
Sipas asaj që shkruan “La Gazzetta dello Sport”, zikaltërit kishin shfaqur interes për sulmuesin gjerman, por asnjëherë nuk kishin nisur një ofertë në drejtim të tij. 27-vjeçarit i skadon kontrata me verdhezinjtë në verën e ardhshme dhe nuk kanë nisur akoma kontaktet për rinovimin e saj.
Si pasojë e kësaj, drejtuesit e Interit do të përpiqen në merkaton e janarit ta transferojnë atë në “San Siro”. Edhe në rast se nuk arrijnë një marrëveshje në janar, zikaltërit do të përpiqen përsëri për ta marrë atë në merkaton e verës, kur mund ta marrin si një lojtar të lirë.
Vitin e fundit Gëce zhvilloi një sezon deri diku të mirë me Dortmundin, teksa u aktivizua në 37 ndeshje dhe realizoi 7 gola.